D Stuagerter Früchtle'
I woiß, was laos ist, brauch net reachte':
Dia Früchtle s’Stuagert, oh, mr kennt s!
Se hent en Gickel ond koin schleachte'
vo'weage'ihrer Resedinz.
Dabei muaß mr dia haoche Herre',
wo ons wia wild regiare'dent,
zairscht älle müahsam zsemme'schärre'
em ganza'Ländle, wenn-es brennt.-
Vo'Stuagert selber stammt natürlich
so mancher au, wo d Karte'mischt,
er hockt em Landtag ganz manierlich,
weil s Glück manchmol e Rendviech ist.
Ond noh mit ihrem Fernsehtürmle!
Was hent se für a Kugelfuhr?
Als wär des ebes bsonders, dent se
wia s Fritzle mit dr airste'Uhr.
Se spöttlet über dia vom Land rei',
weil mr selt dusse'net viel lern',
lent zua sich Sempel bloß vo'Stand rei',
denn gleich ond gleich gesellt sich gern!
Zwor wächst-des muaß-en gaoh'dr Neid lao'-
e gueter Tropfe' z Stuagert rom,
se müaßt halt dr Sonne'Zeit lao',
beim Schaffe'brengt sich koiner om.
Em Wappe'hent se-jetz was denkst au?-
e Gäule halt, e schwarze Stuat,
ond wär-en liaber e Hengst au,
für Stuagert ist dia Stuat noh z guat!
Doch sei s, wia s wöll, mr nemmt se eabe'
samt Krattel, wia se send.
Au s Ao'kraut hot e Reacht zom Leabe',
ond we-mr s grad verrupfe'könnt!
(Unbekannt)