"Gang, Büable, hol en Zehner Bier,
i schneid derweil de' Rätig,
bei deare' Hitz verschmacht e schier -
bis d konnst, ists Vesper feetig."
D Lammwiite sait: "Gibs Krüagle her!"
ond lohts am Hahne' schomme'.
Ond d Wütschaft ist noh lotterleer -
wer wuud ao iatz schao' komme'?
Dr oa'zig Gast am Tisch ein Eck
bot Duust - ma' haörts am Zische'
ond kaum ist so e' Schoppe' weg,
noh bstellt r glei en frische'.
Ond sengt ond sengt aus vollem Hals
oa' Liadle noch ein andre',
r sengt vom >Jäger aus Kurpfalz<,
vom >Rehlein< ond vom >Wandre'<.
r seng, sait d Wiite, schao' e' Stond,
sei' Bierglas bhäb deneabe',
ond sag, r häb koan bsondre' Grond,
nao Duust ond Freud am Leabe'.
"Iatz, Büable, lauf! sotts ebbes gea',
ond will dei' Muater schelte',
noh saist, de' häbst en Zfriedne' gseah',
ond Wonder seie selte'."
(Sebastian Blau)