S kommt a Wolkabruch


Schwere, schwarze G'witterwolka
Hend mitonder böse Folga,
Hagel, Blitz ond Brandgeruch
Oder gar an Wolkabruch.

Wolkabruch en ons'rem Flecka,
Dös ischt äls a grausser Schrecka,
Weil mer's halt so tragisch nemmt,
Wenn eim's Viech em Stall rom schwemmt.

Für des Wasser, für des trüabe,
Hot kei Mensch a b'sondre Liabe,
Ond es ischt an arge Buass,
Wenn mer davo schlucka muase.

Blos mei Jakob, muass i b'richta,
Wollt amol net druff verzichta,
Ond hot desshalb, o'bedacht'
A künstlichs Wolkabrüchle g'macht.

Grombira hot mer verlesa,
Nochher g'wascha mit em Besa.
Aus em Zuber, vor am Haus
Zog mer's aus am Brüahle raus.

S Jakoble, mit seine Faxa
Sprang dromrom mit seine Haxa,
Jodelt fest darzua sein Spruch.
Obacht! - s kommt a Wolkabruch.

Währle, s hot net lang genomma
Ischt des O'glück au scho komma,
Mit'ma Plumpser, eis, zwei, drei
Flog ear en dean Zuber nei.

Dobei sieht ear grad em Ducka
D Muater aus em Fenschter gucka,
Glei ruaft sie ehm nuff ens Haus
Ziagt ehm s'Hemd ond d'Hösla aus.

Weil bei deane ernste Sacha
S Christophle musst au noh lacha,
Hot mer kurzerhand verfüagt,
Dass äll beide Hieb hend griagt.

Deshalb lässt sich's net guat spassa,
Mit deam Element, deam nassa,
Wer's net glaubt, denk' a dean Spruch.
Obacht! - s kommt a Wolkabruch!

(Christoph Kleinbeck)