Vom Moia'stecke


So will s en dr Walpurgisnacht
dr Brauch seit alte Zeite',
daß d Buabe' nausgaohnt en de'Wald
ge Birke'böömle schneide'.

Dr Wenter ist zom Flecke'naus,
ond d Sonne'ka jetz lache',
drom will dr Bua sem"Gege'stand"
e Freud, e groaße'mache'.

Drom will e jeder halt seim Schatz
(do loht de koiner schrecke')
akrat vor s Kammerfeaster na'
en greane'Moie'stecke'.

En Moie' halt mit Bändel dra'
ond mit me' seidne'Tüachle.
Wer woiß, wenn s Feaster offe'-n ist,
langt s au noh zo-me'Bsüachle!

Jo, d Liab, dia hot do d Hand em Spiel,
ond wo'se na'fällt, leit se,
se frogt net lang wieso, worom?
Noi',was se hot, des geit se.

Doch Mädle',dia wo ao'treu send
ond falsch wia knütze Biare',
dia krieaget-des ist d Stroof dafür-
en dürre'Boom vor d Tüare'!

So ist-es schao'vo'jeher gwä;--
doch krieaget heut vo'zeahne,
wenn s guat goht, siebe'dürre Bööm,
uf drei bloß kommet greane!

(Heinz-Eugen Schramm)