Urlaubsgschwaetz


"Dao guck na-ja was?-d Frau Müller!
Send Se glücklich wieder zrück?
Gell-Sia hand doch dicke Backa?
Oder täuscht me wohl mei Blick?
Hant Se dao a ganz nuis Däschle?
Ischt dees Düachle von Meran?
Wisset Se-mei Ma' gaht lieaber
ällig duschuhr nach Terlan!

Oi'maol ben i mit mei'm Gatta-
denket Se!-gschwend z Capri gwea!
Ha-dao hao-n i fatzagleiche Schühala gseha.
Hant Se ao a Fläschle rüber-
narr-wia hoißt r denn dear Wei'?
Ond Ihr wonderscheana Kette-
dui ka bloß von sell her sei'?!

Gfallet Ehne d Italiener?
Gell-dia glotzet oin so a'!
Ond drbei hant se z Venedig
net amol a Stroßabah'!
Send denn z Rom dia viel Ruina
endlch maol auf d Seita gräumt?
Mei-i hao von so ma Weschtle
grad wia s Ihre oft scho träumt!

Hant Se ao Bekannte troffa?
Gell-dao dappt a Haufa rom!
Ond was dia für Zuigs älls esset-
noi-dees ischt o's ällig z domm!
Hat s bei Ehna ao em Urlaub
koine reachte Spätzla gea...?"
"Doch-a baarmol!" schreit d Frau Müller,
"mir send nämlich z Stuagert gwea!"

(Rudolf Weit)