Uferpromenade


Direkt am See möcht i it wohna,
im Sommer, wenn's schö Wetter ischt.
Do laufed ganze Prozessiona,
de oine hott, de andere wischt.

Saued, schiaked ane,
oft mit Kegel und mit Kind.
Nudelfette neabed Rahne,
wia d'Poschdura halt so sind.

Lange Tremer, kuuze Stumpa,
Speltaherrged, Leit mit Kröpf,
Noble Dama, Fifazlompa,
G'schorene und Wuschelköpf.

Rucksackträger, Rädlesflitzer,
Kopftuchede mit lange Röck,
und dia Schnauzer und dia Spitzer
lupfed d'Füeß an jedem Eck.

Weiber, dick wia Wiesawalza,
laufed im Bikini rum.
Junge Päärla sind am Balza,
vergessed älles umse rum.

Ischt denn heit koi Mensch beim Schaffa,
ischt älls uf Seebesichtigung?
Mir hond im Land vo de Schlaraffa
a große Völkerwanderung.

Älle Sprocha hört ma schwätza,
so isch früh' bloß z'Babel gsei...
Wo dia her sind, kascht bloß schätza,
Schwoba sind it viel dabei.

Und se fuettered d'Enta, d'Spatza,
au d'Möwa krieged ebbes aa.
Sui selber, schau de kleinste Fratza,
beißed an de Bg Mäc raa.

Oder schlotzed Eis im Hüetle
und naged an Melonaschnitz.
Älls im Laufa, descht it gmüetle,
i ben froh, dass i grad sitz.

Und denk, wo i do bin gsessa,
Leit geits meh wia haufagnua.
Bloß, des sott ma it vergessa,
selber g'hört ma au drzua!

(Hermann Rehm)