Spätzles-Rezept


En a Schüssel kommt a Pfündle Woizemehl
ond drübernei klopft mer Oier zwoi bis drei.
Wasser ond au Salz a Quäntle.

's Ganze schlägt mer no wia domm
solang en dr Schüssel rom,
bis mer's Toigle schließlich glatt hot
ond dia Arbet ghörig satt hot.

Ond wenns no au Blosa geit,
liabe Leut, noh isch's so weit.
Mittlerweil kocht uf'm Herd
's Wasser gsalza, wia sich's ghört.

Jetzt kommts Spatzabrettle dra,
Toig druff ond noh schabt mer monter -
des will glernt sei, bis mers ka -
ällen Toig ens Wasser nonter.

So, ond jetzt guckt mr en Ruah
dera Gschicht a Weile zua.
Send a paar Minütle rom,
ruaft mr dreimoal: "Spätzle komm!"

Ond scho schwemmat älle dia Spätzle oba en dr Brüah.

Uffpaßt jetzt ond net lang bsonna!
Rausgfischt älle, no isch gwonna!
Ond damit's koin wüaschte Babb geit,
wird des Wasser abgseit.

So, ond will mer jetztet noh
ebbes ganz Besondres do,
braucht mer bloß dia Spätzla schmelza,
älle rom em Butter wälze.

Wia mr's ißt!

I glaub, i brauch des uich net uf d'Nas nufbenda.
D'Spätzla werdet en da Bauch scho alloinigst nonterfenda!