Grad so isch!
So mancher geit sichwärrle Müha
ond wills mit Gwallt vrzwenga,
sei Nebamenscha om sich rom
a weng zom lacha brenga,
A bissle hischt, a bissle hott-
ma guckt noch aelle Seita,
doch ob dui sach oim z letzschda glengt
dao laesst sich drueber streita.
Gottlob dass one zfrieda send
- sell muass ma wohl bedenka -
denn grad de sodde leant sich schnell
ond gera au beschenka
ond lachet helle Schocha naus
fuer dia isch gar nex z wenig
ha wann ma halt so lacha ka,
nao ischt ma wia an Keenig.
An andrer sodde geits halt au
dear legt sei Stirn en Falta:
"Jetzt hat ma ausgerechnet mi
bestemmt zom Narra ghalta!
Moint dear vielleicht, sell merk i net?!
Deam werr i d Moineng saga !"
Ond eah ma sich no reacht vrsieht,
dao gahts oim schao an Kraga.
Was duat ma dao,
s koennt oim scho schier vrganga!
Am beschta ischt,ma lacht drzua
ond duat sich wieder fanga.
Narr-wann ma selber schempfa daet
mo daet ma dao wohl landa?
Am End gaebs aus dr kloischta Muck
da groeaßschta Elefanta...
(Rudolf Weit)