Samstich isch!


Samstich isch, 's isch et domm,
dui Woch isch au scho wieder rom.
Mr hot zom doa e' Hof ond Haus,
dr' Schwab goht meist erschd Obed's aus.

Der Dag dr' hoim kommt oim scho gleaga,
mr ka a' mal wieder 's Trottwa feaga.
Früher hot mr, 's hot koim g'schadet,
meistens halt em samstich's badet.

Au wenn dia alte Sitta langsam verfallet,
viele oinaweg am Sonntig schö sei wellat.
So an Dag dea muaß mr nutza,
's Badwasser ka mr nemma zom butza.

Wenn älles dau isch ond mr 's zo sonst nix nemma ka,
wäscht mr halt no d' Staffel na.
Dr Schwab hot scho emmer, er isch's g'wohnet,
durch sei Natur dui Omwelt g'schonet.

E' dr Küche duad Hausfrau verheirot oder ledich,
samstich's bloß des, wa obedengt naidich.
Au scho früar als gleis Büable,
weiß i no vom Samstichsüpple.

Natürlich hot d' Muader zwischenei,
au mal Kartoffelschnitz oder a Oi
für dui Supp e' d' Fleischbrüa nei.
Erst Samstichmittags nach em Bade,
hot d' Oma oder d' Muader zor Brezet g'lade.

Frisch aus em Ofe des war a Duft,
so de richtich Samstichmittagluft.
Em Abed's, des derf i et vergessa,
da hot mr Soitawüarstle gessa.

Des woiß i no wia heut,
1 Würstle hanne kriagt, hau i mi g'freut.
War dr Honger grauß, mr hot sich selber agloge,
ond 's Wüarstle uff em Brot noch henda g'schobe.

So isch am Afang d' Freud ond am Schluß,
schliaßlich ond endlich dr Genuß.
Des isch so g'wea, mi hots nia greut,
eiteile ka i mir älles no heut.

(Walter Rieck)