Ooser Laendle
Brauch i dees no lang vrzaehla?
s' ka bei o's an gar nix fehla,
weil's en so ma Laendle, Leut,
naemlich no so aelles geit!
En'ra ewig langa Gschicht,
hent dees Laendle butzt ond gricht't"
Frische Gsella, reachte Moischter,
Baura, Dichter, gscheite Goischter,
ond dass nix vergessa sei:
d'Weibsleut khairat ao mit rei!
Mammut, Baera, Elefanta,
ond ao Koepf vom urverwandta
airschte Menscha send em Land.
Ha' sell ischt doch entressant!
Ritterleut auf stolze Roesser,
Baurakrieag, verbrennte Schloesser,
reiche Stadt ond alte Burga,
Filderkruat ond saure Gurka,
Guggugsuhre, Regulater,
schoene Kircha ond Theater,
Gold ond Eisa, Erdoel, Salz,
Aepfel, Hopfa, Gaeul ond Schmalz,
Voegel, Bloama, stille Waelder,
Frucht ond Rueaba, reiche Felder
ond dr Wei', dass du's fei woischt,
samt'm Mooscht ond Kirschagoischt!
Ond nao kommt von manch'ra Kuha,
Butter, Milch ond Kaes drzua.
Kloeschter, Weiler, warme Baeder,
Zeitongsdrucker, Eiseraeder,
Schuha ond Auto, woihe Tueacher,
Pflueag ond Zeppelin ond Bueacher
ond viel Konscht ond Wissenschaft
narr mir hant an Haufa gschafft!
Drom sag i ao frank ond frei:
's koennt wohl mancher neidig sei'
,fang i a beim kloinschta Wurm
ond mach nauf zom Muenschterturm.
Net vergessa, i moecht bitta,
alte Braeuch ond edle Sitta,
ond drzua die bonte Trachte!
Ha, die der ma net vrachta.
Bsonders, so wurds aelleweil sei'
wann a Maedle schlupt dren nei.
Freile onder aell de Gschoepf
geihts ao Leut mit harte Koepf,
doch se send vom reachta Holz,
ond drom ben i ao so stolz,
weil's halt grad durch sodde Leut
so a Laendle zsammegeit!
(Rudolf Weit)