S ischt waerrle wieder still em Haus,
koi Stauna meah, koi Lacha,
doch ondram Chrischtbaum liegat no
so manche schoene Sacha.
Zwar-s Dieters Trommel hat a Loch
(sell koenn ma wieder flicka!),
a Rama leit vrlasse doa
fuer s Liesele zom Sticka.
Ond d Zigarrkischt ischt halber leer
(doa muascht da Vadder froaga!),
ond mit deam guada Flaeschle sell
braucht r se nemme ploaga.
Bloss schad, dass grad de nui Krawatt
hat schao den Spritzer gfanga
(wenn naemlich d Ga's waer woicher gwea,
waer's ohne dean au ganga!)
Dr Morgarock-a prima Stueck
(r haeb dr Muadder gfalla!),
dear leit- schao ei'packt em Papier-
a zemlich dicker Balla!
Sobald gaont d Laeda wieder auf
(sell haett ma wissa koenna!),
dao wett scheints Muadder (lach fei net!)
mit Schwong zom Omtausch renna.
Dr Christbaum freile denkt ssei sach-
r ka schier net vrmacha!
Statt Traena fallet Nodla ea,
grad mitlescht nei en d Sacha.
"Ob dees dr ganze Nutza ischt",
senniert r, "von deam Feschta?!
Wann so'scht nex anders uebrigbleibt,
i halt mei Maul am beschta!"
(Rudolf Weit)