Lauter reachte Leit ...
Send mir Schwoba - mit Vrlaub - daerf i dees wohl saga?
Send mir waerrle koine Leut duschur zom vertraga?
Freile, wann mr narret send,
nao kommts aellig grob am End.
Ond nao geits koi langs Gefackel:
Dippel hoisst ma d'Leut ond Dackl.
Braegler geits ond zom Exempel
noh drzua na rechte Sempel!
Klaamhaocka, Glufamichl,
Lahmarsch, Trialer so gaht's Gstichel,
doch ma moints noh lang net grob,
sait ma Rambas oder Klob.
Narrabattle, Schlamper, Tralle,
Lugabeutel oder Lalle,
Vivatzlomp ond dommer Zipfel,
sell ischt gwiss no net dr Gipfel.
Noi, ischt ma en Schdemmong grad,
setzt ma aellas ens Quadrat
ond sait "ober" vorna na,
dass halt ja net fehla ka.
Ond no geits noh Allmachtslackel,
Riesa- ond Granadadackel,
ond so schdoigerts sich halt nauf,
s'hairt aels waerrle schier net auf!
Moinschtens aber isch bassiert,
wann ma da Begriff halbiert:
duat ma "Halb" noh vorna na,
nao fang airscht dr Lebdag a'!
Aber dass kein Zweifel geit!
Soscht send mir fei reachte Leut!
(Rudolf Weit)