Lach halt drueber!
's Leaba, sel woiss wohl a jeder,
bringt oim manches, Dag fuer Dag:
O'guads, doch zom Glueck drzwischa
au maol Bessers, wann dr sag!
Ma ka bloss dao jedem raota,
Dass'r nia nex dragisch nemmt.
's koennt vielleicht am End soscht hoissa,
dass dao ebbes nemme schdemmt.
Lohnt sich's aus dr Haut zom fahra,
wann oim's Glueck vrlora gaht,
wann zom Guggug ma em Lotto
wieder maol koin Sechser hat?
Soll ma bruddla, wann am Schreibdisch
d 'Schublad wieder richtig klemmt?
Noi, meuasst ma am End ma saga,
dass dao ebbes nemme schdemmt.
Oder soll ma sich drom aergra,
wann dr Nachber schwaetzt domm raus?
Wann dr We'd de gschlaga Naacht durch
wetteret ond heult oms Haus?
Oder wann heut jeder sammlet,
bis ma z'letzscht voll schdaht em Hemd?
Noi, ma mueasst vielleicht bloss saga,
dass do ebbes nemme schdemmt.
Morom regt ma sich ao drueber
aellig wieder fuerchtig auf,
wann ma merkt, dass en de Laeda
d'Preis gaont ao scho wieder nauf?
Morom duat ma do net schpara,
schdatt dass ma bloss weiterschlemmt?
Ha, ma muasst am End halt saga,
dass do ebbes nemme schdemmt.
Muass ma ao glei narret werra,
wann maol s'Auto lauft net a'?
Oder wann ma sodd maol niasa,
ond barduh net ka?
Leut, ma sodd maol drueber lacha,
weil dees mancha Aerger nemmt,
ond nao ka ao neamer saga,
dass dao ebbes nemme schdemmt.
(Rudolf Weit)