Kartagrüaß


Äll Johr ischt dees nämlich s gleiche,  akkurat fei om dui Zeit;
d Poscht, dui brengt oim jeda Morga Kartagrüaß von viele Leut.
Jedrma' duat oim halt z wissa, mo nr grad em Urlaub ischt.
Mit'm Wetter, so schdaht gschrieba, häb ma's wieder guad verwischt.

Guck, bei vierzig Grad em Schatta, schickt ma oim a Gruaß aus Rom,
ond an andrer duat ganz gschwolla, mit de Türm vom Kölner Dom.
"An dr Nordsee grünen Fluten denken wir so oft an Dich!"
Oiner kriagt z'Mallorca donta schiergar scheints an Sonnaschdich.

Ond an Gamsbock sieht ma loina: "Gruß von steiler Felsenwand!"
Aber Spätzla sell gäb s koine "an des Nigers trägem Strand".
Aus am Schwarzwald kommt a Grüßle, ond ma halt's fei wärrle aus.
Oiner wett oin schlieaßlich trätza mit ma Gruaß vom Hofbräuhaus.

Heammelblau mit Sand ond Wasser kommt a Kart von Jesolo,
ond dr Frieder sei vrhocket, schreibt'r, neulich irgendwo...
So gaht's furt, aus Eck ond Enda, aber neidig ben i koim,
noi,  i freu me ond ben zfrieda - ond grüaß jeda von drhoim!

(Rudolf Weit)