I hätt...i daet!
Beim Hirschwirt send se neulich gsessa
ond hant fei s Trenka schier vergessa
vor lauter Fuassballschpiel-ond so,
natuerlich bloss em Radio!
Ond mo s nao klappt hat-
ha dui Freud!
"Ja-gell! Dao glotscht!
Mir send halt Leut!
Mir schiesset d Toerle bloss so nei',
ha narr-s ka ao net anderscht sei'!"
Doch wia s nao schleachter gang-n ischt,
hat mancher aels sei Hira gwischt
vor lauter Sorg ond lauter Schwoiss.
So ebbes macht natuerlich hoiss!
"Sia soddet halt...", hat oiner gsait,
"dia hant zom Guggug z wenig Schneid...
Dao mach i glei mit uich a Wett:
Was glaubet r-wann i... i haett!"
Em zwoita Toil, glei nach dr Paus,
dao siehts a bissle besser aus.
Drom steigt, sell merkt ma waerrle guad,
bei aelle Manna glei dr Muat:
"s fehlt no a Toerle- heidanei!
Ja-ka denn ebbes soddigs sei"?!
Potz Blitz-jetzt isch am End gao z spaet!
Wann i bloss-glaubsch-wann i...idaet!"
Ha narr-so send se halt aels so Leut!
Am Bierdisch send se nei'maol gescheit:
"I haett!"so schneid't dr oine auf,
"i daet!" so sait dr ander drauf...
Bloss loider- bei dr Red-nex wia:
Was moinscht!" "I haett!"..."I daet!"
(Rudolf Weit)