A guader Freind
S'gibt ebbes, des isch salta worda,
des isch scho fascht Raritaet.
Des isch, wenn oiner heut ond morga
bei guat ond boes zu dr schdeht.
A guater Freind, der isch schtets do
wenn g'feschdelt oder g'feiert wird.
Er isst ond trenkt, er lacht ond sengt
ond freut sich so mit dir.
Er haelt dia Schdellung ond des Glas
bis morgends frueh um vier.
A guater Freind, der sagt net noi,
wennd' fragsch: "Gehn mir mol aus?"
Zu zweit macht manches halt meh Schpass
ond mr kommt aus am Haus.
A Freindschaft, dia isch so viel wert,
viel meh als Gold ond Geld.
A guater Freind isch nie vorkehrt,
doch selta auf dr Welt.
Doch Freindschaft, die ischt net beschraenkt
auf's feschdeln, feiern lacha.
Au wenn sich's mancher doch so denkt,
s'gibt gnuag andere Sacha.
Wenn dr's net guat geht, was isch no,
sind do dei viele Freind no do?
Fehlt dir's am Geld du armer Wicht,
werdet dei Freindlesreiha licht?
Bischt net guat druff ond schwatsch an Kaes,
nimmt dir's krumm ond werd mr boes?
Hasch viel zu Werkla ond zu Schaffa,
duan do dei Freind von aussa gaffa?
Bei solche Sacha sieht mr glei,
was echte Freindschaft ischt.
Doch um an guata Freind zu haba,
do gibt's bis heut koi Lischt.
A Freindschaft wird em Herz gebora,
waechst im Maga, net im Kopf.
Ond wer sei Herz net oeffna ko,
der bleibt an armer Tropf.
A guate Freindschaft will was heissa.
Etz schpitz dei Ohra ond hoer zu!
I ko mi ehrlich gluecklich preise,
weil i an Freind hab so wie Du.
(Wilfried Albeck)