En dr Fasnet


Ei'trittsgelder ond Girlanda,
bonde Kappa, Musikanta,
Maska, Nasa, gmoilde Gsichter,
Bloamaschmuck ond roade Lichder,
Budena fuer Sekt ond Wei':
Heut will aellas narret sei'!

Dicke Luft, koi Platz zom sitza,
Schwofa, drucka, schieaba, schwitza,
woiche Kraega, leichte Gwaender,
falscher Schmuck ond grelle Baender,
dicke ond ao duerre Leut:
Aelle send se narret heut!

Jonge Stift ond gschdandne Moischder,
net grad schlanke Kuechemoischder,
Scheichs ond ao aels Sportkanona,
Hennazuechter als Barona-
sell sieht bald a jedes Kend,
dass dia heut reacht narret send.

Rittersleut ond Edelknappa
sieht ma stolz em Saal romdappa,
Rattafaenger ond Matrosa,
Haremsdama, Pfluderhosa,
wilde Cowboy mit ma Colt,
Mauerbleamla, zart ond hold.

Falsche Fufzger, faule Reda,
Lieabesschwuer ond viel Moneta,
Broatwurschtsossa auf-m Ruecka,
enge Schuha ond Miaderdruecka...
Schlieasslich gangad d Liachder aus,
ond ma schleicht sich muead nach Haus...

Katzajammer, Kaffebohna:
Leut - dao will i ui' vrschona!
Hering, Omschlaeg, Gliederreissa:
oiner soll mr do beweise,
ebbes soddigs, sell sei fei'!
Dear muass schao reacht narret sei'!

(Rudolf Weit)