Em Kiahlschrank standed eng zsamma
des Mehl, dr Zucker und dr Zimt,
die zuafällig zsamma kahma
ond warted, was ma ondernemmt.
I ben so wichtig, sagt des Mehl,
des kennd ihr mir gern glauba
ond mach draus au koin Hehl,
dr Zucker hörts mit Schnauba.
Wenn's mi ned gäb, du Mehl bisch domm
wird koiner Plätzla essa
ond wenn du frogsch, wieso, warom,
mr isch uff siaß vosessa.
Doch weihnachtlich, moint do dr Zemt,
wirds koim richtig schmecka,
wenn mr a Stick von mir ned nemmt,
kennt ihr s'Gebäck vostecka.
Im Nebafach feixt frech dr Butter,
was reged'r eich so furchtbar uff,
wie staubig wär des Weihnachtsfutter,
käm do ned dicke Butter druff.
s'Backpulver moint schliesslich noch,
ihr henn jo mi vogessa,
do gehn ihr älle gar ned hoch
ond niamards ko eich essa.
So wird no fröhlich ogmengt,
des Mehl, des Salz, da Quark,
ond die Moral von derra Gschicht:
Jo bloss mitnander senn mr stark.
(Unbekannt)