Eah dr Has legt Oier


Dr Dag leit muead no rom oms Haus
ond reibt vrschlofa d'Auga aus,
bis dass dr Gockl neabadra'
fangt quietschfidel zom kraeha a'
ond d'Henna gackaret wie net gscheit,
jetzt woiss dr Vadder" 's ischt soweit!

'r schleicht se hoimlich, aber gschwend,
an groassa Kraetta en de Haend
mit Oier, Spielzeug ond Schoklad,
a Oschderhas, so ganz privat,
dass's neamer merkt, en Garta naus,
als Fuerstand von deam stilla Haus.

Ond nach ma laengscht vrfassta Pla',
dao legt 'r sell a Oile na'
ond do a Haesle ond an Ball,
vrtoilt sei Sacha ueberall,
was selbstverstandlich pfondig klappt,
bloss dass 'r grad a Oi verdappt.

Sell aendert aber d'Stemmong net,
'r moint, ma lieg ja no em Bett,
obwohl ma hintram Vorhang guckt
ond d'Maesla fescht and Scheiba druckt.
Bloss, wann 'r spickt, nao huschts drvo',
ha noh, ma laesst 'm d'Illusio'!

Nao aber schnell en Hausgang nei',
gard, wia wann gar nex gschehe sei!
Ond wia n'r schreit" "Dr Has hat glegt!"
Narr, froag net, wias em Haus sich regt!

(Rudolf Weit)