Dr Leichaschmaus
Em Frieder isch sei Kätter gschdorba,-
Es hot em ned grad viel verdorba,
Se isch a Ripp gwä obaraus
Ond hot'n plogt johrei, johraus.-
Jetzt ische dod, Gott häb se seelich,
D'r Frieder tröschtat sich allmählich.
Ond bis beinand send älle gwä,
Do hot's brav Wei ond Kuacha gä.-
Ond emmer mehner Leit send komma
Ond hent halt >> Atoil<< gnomma,
Ond hent ihr Glas, wia sich's so ghert,
"Uf's Wohl" der Kätter g'leert!
Drom duat net oiner sich baklaga,
Wie z'mol läßt der Pfarrer saga,
D'Leich sei om sexe schtatt om drei,
Weil drengend er verhendert sei.
Do isch nix anders iebrig blieba,
Als daß se sich hent d'Zeit vertrieba,
Descht net grad schwer,'sisch Wei em Haus
Ond sontigs Sach zom Leichaschmaus.
Je meh se rote Meckel kriega,
Je greeßer worda-n-isch's Vergniaga,
So daß se z'letschda gsonga hent,
Ond schlieaßlich au no danzt am End.
Dia Baura deant bei sotte Sacha
Sich net grad viel Gedanka macha.
Ond wiea's hot nex meh z'drenka gä,
No isch au Zeit fir d'Leich grad gwä.
A Prachtsred hot dr Pfarrer ghalta,
Da Frieder hot em Aug er bhalta,
Er hott vom Danz scho ebbes gheert,
Ond hot sich drieber arg empeert.-
Ond wia se nochher hoim send ganga,
No hot er dovo a glei gfanga;
"Isch wohr, du Frieder,-sag's no raus,
Hent danzt ihr heit beim Leichaschmaus?"
"A bissle" secht dr Frieder trocka,
D'r Pfarrer, der isch ganz verschrocka,
Ond secht zom Frieder ganz entsetzt:
"No sag mr bloß des oine jetzt,
A Leich liegt en d'r Schtuba drenna,
Ond ihr, ihr hent do danza kenna!
I hätt's net glaubt, bei meiner Ehr,
Dass so was no au möglich wär." -
Druf secht der Frieder obefanga:
"Ha, zerscht hot's am Platz a bissle gfehlt,
Bis mer da Sarg vor d'Dier hent gschdellt!"
(Otto Keller)