Dr Hausball
D' Tante Lina kommt als Dirndl
ond dr Onkel Fritz als Schah,
ond ihr Jonger macht an Cowboy-
narr-ma kennt dean Denger ja!
Guck-dr Nachbar Hugadubl
hat als Gammler sich vrkloid't!
Oiner aber-so a Ritter-
duat oim en seim Blech dren loid.
Sodde geit's-ond andere Maska:
gschecket, duerr ond kugelrond
ond dr Haeberle-dear Sempl-
bellt aels wieder wia-n-a Hond.
Endlich nao so gega neune
hockt am Tisch dui bonta Schar
ond se lobet dapfer d Hausfrau,
s schmeckt-n naemlich wonderbar.
Ao dr Hausherr zoigt sich nobel
mit seim Kaepple von Papier
ond em Sofa dren vrdrucket
drei vier Dicke sich fei schier!
Bis no s Grammopho' duat dudla,
d Jugend naemlich wett an Danz,
bloss nadierlich Tante Lina
hommset s Liad vom Jungfernkranz".
Manch a Zigarr muass dra glauba,
dui dr Hausherr stolz spendiert,
manch an Pfropfa hairt ma knalla
ond was soscht halt no bassiert!
Glei nach zwoelfe send Girlanda l
aenscht schao nemme an ihr'm Platz
ond dr Ritter ueabt an Handschdand
ond da Goldfisch, dean frisst d Katz.
Em Klavier dren jault dr Dackel.
Tante Lina kaeaft ond schreit,
weil dr Onkel Fritz dr Selma
noh barduh a Kuessle geit...
Morgends fend't ma bloss no Scherba,
leere Flascha, kalta Rauch.
drenn em Bett, do stoehnt dr Hausherr,
hebt da Kopf sich ond da Bauch...
(Rudolf Weit)