's Bahnwaerterhaeusle



Mittle' zwische' zwua Statione',
Holderbüsch ond Stangebohne'
stoht am Bahdamm uf em Roa'
zmol e Häusle, wenzig kloa'.

Kender gompet a' me' Bronne',
Henne' pfludret uf em Hof,
uf dr Stapel voler Schlof
leit e Hond ond loht se sonne'.
Hentrem Haus am Gaatezau'
hanget Wäsch zom trückne'-lao',
ond am Roale übrem Gloas
graset aoscheniert a Goaß.

Neabem Schlagboom stoht e Ma'
mit re' Schildkapp ond re' Fah'.
Bhäb, es gheit en schiergär om,
feagt es Zügle vor em nom.
Aber aih ma' gsieht ond guckt,
hot en schao' dr Rauch verschluckt,
ond vom ganze' Bahwarthaus
gucket grad noh's Dächle raus.

(Sebastian Blau)