Auf dr Schlittabahn



Ueber 's Nachbers Wieasabuckel,
sell, mo d Baeum a Bah' geant frei,
fahret se mit ihre Schlitta,
ond se johlet fescht drbei:
s'Fritzle, d Liesel ond dr Karle
ond nadierlich d Annagret!
Hui-ond ihre Schlitta sauet
ueber d Huppel wia dr We'd.

Warme Kaeppla auf de Koepfla,
bonte Haedschet ueber d Faeuscht
ond en reachta dicka Mantel-
woischt nia, wann da dennaleischt!
Guck, grad gaht's mit schwong em Boga
om an Maulwurfshaufa nom,
ond dr Karle, seller Lauser,
keit mit Fleiss da Schlitta om.

Ond schau warglet ueberanander
oi's oms ander hentadrei,
ond jetzt wuahlat dr ganze Haufa
sich en Schnea, en tiafa nei.
Ond se waalet ond se schucket
ond sehant grad wia d Mueller aus,
aber onder ihre Kaeppla
leuchtet roate Baeckle raus.

Dapfer wieder nauf da Buckel!
"Bah'frei!" schreit ma ond schieabt a'-
ond so gaht des bis en Aobad
laut ond luschtig ueber Bah'.
Bis no aellig d Beatglock mahnet-
ond dr Honger, wann dr sag!-
Muead ond selig en seim Bettle
traeumt ma bald vom naechschta Dag.

(Rudolf Weit)