Am Fuaderhäusle
An meim Feaschter hentanaus,
dao hangt jetzt a Vogelhaus,
ond i guck en Seelaruha,
ällig selle Vögel zua,
dia-sell ischt ja wohl bekannt-
om dia Zeit viel Sorga hant.
Ond denk mrso mei Sach,
wann no äls von Nochbers Dach
kommt a Moisle-ois, zwoi, drei,
grad als sags: I ben so frei!
Ond zom Dank, doa zwitscherts hell-
nao verschwendets wieder schnell.
Zmal-em Buschdrnebadra'
fangt a Spatz zom tschülpa a',
duat ond treibt wia narret om,
hopft ao schlieaßlich vollends rom,
grad als wärs am End a Gnad,
daß r ao an Honger hat.
Zletschta hockt rmiddlescht nei',
schieabt ond sackaetfeschte ei',
pluschtret auf sei Feadrakloid
ond macht sich em Hanf dren broit.
Für sell Moisle ond an Fenk,
dao stahts schleacht, wenn i s bedenk!
Ällaweil no-en oira Tour
frißt dr Spatz-von Dank koi Spur,
omkaihrt grad: dean plaogt dr Neid!
Wann dees noh koi O'glück geit?!
Gera hollt a flenka Katz
so an fetta, domma Spatz...
Freile-s hoißt an alta Regel:
Sodde geits-ond andre Vögel!
(Rudolf Weit)