Woromn scho wieder?
Woromn grad jedz?
Woromn ned älles zamma:
Wenderafang au Weihnachda Heilnachda on a guads Neis?
Oder wenigschdens erscht am 21. März:
Zeit da dia Könige pflegten ins Feld zu ziehen-
wo se anander dr Riasl vrschlagaa
ond d Weiber glaud hen
weil se em Frihleng dr Haber gschdocha hod
weil se s Hemmad gjuggd hod
Woromn scho wieder heidanei?
Da kommsch doch zo nix anderem meh
vor lauder herzliche fröhliche glückliche seeliche
Glückliche Wunschlücke Punschlücke
Wann soll mr do no sei Sach schaffa?
on bloß weil domols dia daube Konsuler
ned ferdich worda send mid dem Uffschdand en Hischbania?
Da drwega soll i scho wieder Bädsch geba
Karta schreiba on aläuda?
Do wär i doch schee bleed-
Da drwega schdohds heid nachd
am zwölfe ned schbidz uff Gnopf
s machd doch sowieso jeder grad so weider
Da kennase Kanonaschläg zenda soviel se welled-
Aus seim Drodd kommt da drwega no koiner raus-
A oobeschriebas Bladd s neie Joahr?
S wird werda wia s alde
mid a baar gloine Änderonga-
Frei de ned z arg
Han ned zviel Angschd:
Obs Eiszapfa hageld oder ned
Mr laufd sowieso hald grad weider
sobald mr wieder ka
noch soma Silvesterdulloh.
(Helmut Pfiserer)